આજે સૌને જયશ્રીકૃષ્ણ
કાલે વહેલા આવજો
હરિગુણ ગાવા, હરિરસ પીવા,
આવે તેને લાવજો
આજે સૌને જયશ્રીકૃષ્ણ

મન મંદિરના ખૂણે ખૂણેથી
કચરો કાઢી નાંખજો
અખંડ પ્રેમ તણી જ્યોતિને
કાયમ જલતી રાખજો
આજે સૌને જયશ્રીકૃષ્ણ

વહેવારે પૂરા રહીને
પરમાર્થમા પેસજો
સઘળી ફરજો અદા કરીને
સતસંગતમાં બેસજો
આજે સૌને જયશ્રીકૃષ્ણ

હરતાં ફરતાં કામો કરતાં
હૈયે હરિને રાખજો
માન બડાઈ મૂકી દઈને
ઈર્ષા કાઢી નાંખજો
આજે સૌને જયશ્રીકૃષ્ણ

હૈયે હૈયાં ખૂબ મિલાવી
હરિનું નામ દિપાવજો
ભક્તિ કેરાં અમૃત પીને
બીજાને પીવડાવજો
આજે સૌને જયશ્રીકૃષ્ણ

સૌમાં એક જ પ્રભુ બિરાજે
સમજી પ્રીતિ બાંધજો
કહે પ્રીતમ સહુ ભેગી મળીને
હરિના ગુણલા ગાવજો
આજે સૌને જયશ્રીકૃષ્ણ