સોના વાટકડી રે,
કેસર ઘોળ્યાં રે વાલમિયા
હે લીલો છે રંગનો છોડ,
રંગમાં ઘોળ્યાં રે વાલમિયા
સોના વાટકડી રે,
કેસર ઘોળ્યાં રે વાલમિયા

પગ પરમાણે કડલાં સોઈ રે વાલમિયા
કાબિયુંની બબ્બે તારે જોડ,
રંગમાં રોળ્યાં રે વાલમિયા
હાથ પરમાણે ચૂડલો સોઈ રે વાલમિયા
ગુજરીની બબ્બે તારે જોડ,
રંગમાં રોળ્યાં રે વાલમિયા
સોના વાટકડી રે….

ડોક પરમાણે હારલો સોઈ રે વાલમિયા
હે હારલાની બબ્બે તારે જોડ,
રંગમાં રોળ્યાં રે વાલમિયા
નાક પરમાણે નથડી સોઈ રે વાલમિયા
હે ટીલડીની બબ્બે તારે જોડ,
રંગમાં રોળ્યાં રે વાલમિયા
સોના વાટકડી રે….

કાન પરમાણે કુંડળ સોઈ રે વાલમિયા
હે વાળિયુંની બબ્બે તારે જોડ,
રંગમાં રોળ્યાં રે વાલમિયા
અંગ પરમાણે કમખો સોઈ રે વાલમિયા
હે એવી ચૂંદડીની બબ્બે તારે જોડ,
રંગમાં રોળ્યાં રે વાલમિયા
સોના વાટકડી રે….