ઢોલીડા વગાડી ઢોલ જાન આવી રે
જાન આવી,
માંડવડે મોંઘેરા મહેમાન આવ્યાં
રૂક્ષ્મણીને લેવા તેનો કાન આવ્યો રે
માંડવડે મોંઘેરા મહેમાન આવ્યાં
ઢોલીડા વગાડી ઢોલ…

શેરીઓમાં ટોળેટોળાં વરરાજાને
જોવા દોડે રે,
રાજકુંવર આવે કુંવરીને લેવા,
જુઓ બેસી રૂડા ઘોડે રે,
લાડકડીને લેવા લાડો જાન લાવ્યો રે
માંડવડે મોંઘેરા મહેમાન આવ્યાં
ઢોલીડા વગાડી ઢોલ…

તોરણિયે જ્યારે આવ્યા વરરાજા,
કર્યા પ્રેમનાં પોખણો,
કંકુ-ચોખાનો કરી ચાંદલો,
સાસુજીએ તમને પોંખ્યા,
લાડકડીને લેવા લાડો જાન લાવ્યો રે
માંડવડે મોંઘેરા મહેમાન આવ્યાં
ઢોલીડા વગાડી ઢોલ…

જાનૈયા તો નાચ્યા ઉમંગે,
જાડિયું ગીત ગાતી રે,
વેવાઈને આવતા જોઈને માંડવે,
હૈયામાં ખુશી થાતી રે,
લાડકડીને લેવા લાડો જાન લાવ્યો રે
માંડવડે મોંઘેરા મહેમાન આવ્યાં
ઢોલીડા વગાડી ઢોલ…