મુખડાની માયા લાગી રે,
મોહન પ્યારા
મુખડું મેં જોયું તારું,
સર્વ જગ થયું ખારું;
મન મારું રહ્યું ન્યારું રે
મોહન પ્યારા
સંસારીનું સુખ એવું,
ઝાંઝવાનાં નીર જેવું;
તેને તુચ્છ કરી ફરીએ રે
મોહન પ્યારા
સંસારીનું સુખ કાચું,
પરણીને રંડાવું પાછું;
તેવા ઘેર શીદ જઈએ રે
મોહન પ્યારા
પરણી હું પ્રીતમ પ્યારો,
અખંડ સૌભાગ્ય મારો;
રાંડવાનો ભય ટાર્યો રે
મોહન પ્યારા
મીરાંબાઈ બલિહારી,
આશા મને એક તારી;
હવે હું તો બડભાગી રે
મોહન પ્યારા