આ તન રંગ પતંગ સરીખો,
જાતાં વાર ન લાગે જી;
અસંખ્ય ગયા ધન સંપત્તિ મેલી,
તારી નજરું આગે જી…

અંગે તેલ ફૂલેલ લગાવે,
માથે છોગાં ઘાલે જી;
જોબન ધનનું જોર જણાવે,
છાતી કાઢી ચાલે જી…

જેમ ઉંદરડે દારૂ પીધો,
મસ્તાનો થઈ ડોલે જી;
મગરૂરીમાં અંગ મરોડે,
જેમ તેમ મુખથી બોલે જી…

મનમાં જાણે મુજ સરીખો,
રસિયો નહીં કોઈ રાગી જી;
બહારે તાકી રહી બિલાડી,
લેતાં વાર ન લાગી જી…

આજ કાલમાં હું તું કરતાં,
જમડાં પકડી જાશે જી
બ્રહ્માનંદ કહે ચેત અજ્ઞાની,
અંતે ફજેતી થાશે જી…