વાગે છે રે વાગે છે
વૃંદાવન મોરલી વાગે છે
તેનો નાદ ગગનમાં ગાજે છે
વનરાવન મોરલી વાગે છે
વનરા તે વનને મારગે જાતાં,

વા’લો દાણ દધિનાં માગે છે.
વનરાવન મોરલી વાગે છે
વનરા તે વનમાં રાસ રચ્યો છે,
વા’લો રાસમંડળમાં બિરાજે છે.
વનરાવન મોરલી વાગે છે

પીળાં પીતાંબર જરકસી જમો,
પીળો તે પટકો બિરાજે છે.
વનરાવન મોરલી વાગે છે
કાને તે કુંડળ, બાજુબંધ બેરખા,
મુખ પર મોરલી બિરાજે છે.
વનરાવન મોરલી વાગે છે

વનરા તે વનની કુંજગલીમાં.
વાલો થનક થનક થૈ નાચે છે
વનરાવન મોરલી વાગે છે
બાઈ મીરાં કે પ્રભુ ગિરધર નાગર,
દર્શન થકી દુ:ખ ભાગે છે.
વનરાવન મોરલી વાગે છે