જનનીના હૈયામાં પોઢંતા પોઢંતા
પીધો રે કસુંબીનો રંગ
રાજ મને લાગ્યો કસુંબીનો રંગ
કસુંબીનો રંગ, કસુંબીનો રંગ
હો રાજ મને લાગ્યો કસુંબીનો રંગ
હો રાજ મને લાગ્યો કસુંબીનો રંગ

જનનીના હૈયામાં પોઢંતા પોઢંતા
પીધો કસુંબીનો રંગ
હો રાજ પીધો કસુંબીનો રંગ
માના ધોળાં રે ધાવણ કેરી ધારાએ ધારાએ
પામ્યો કસુંબીનો રંગ
હો રાજ મને લાગ્યો કસુંબીનો રંગ

એ બહેનીના કંઠે નીતરતાં હાલરડાંમાં
ઘોળ્યો કસુંબીનો રંગ
હો રાજ ઘોળ્યો કસુંબીનો રંગ
એવી ભીષણ રાત્રિ કેરા પહાડોની ત્રાડોએ
ચોળ્યો કસુંબીનો રંગ
હો રાજ મને લાગ્યો કસુંબીનો રંગ

એ દુનિયાના વીરોનાં લીલા બલિદાનોમાં
ભભક્યો કસુંબીનો રંગ
હો રાજ ભભક્યો કસુંબીનો રંગ
એવા સાગરની પારે સ્વાધીનતાની કબરોમાં
મહેક્યો કસુંબીનો રંગ
હો રાજ મને લાગ્યો કસુંબીનો રંગ

એ ભક્તોના તંબૂરથી ટપકેલો મસ્તીભર
ચાખ્યો કસુંબીનો રંગ
હો રાજ ચાખ્યો કસુંબીનો રંગ
એવી વ્હાલી દિલદારાના પગની મેંદી પરથી
ચૂમ્યો કસુંબીનો રંગ
હો રાજ મને લાગ્યો કસુંબીનો રંગ

એ નવલી દુનિયા કેરાં સ્વપ્નોમાં
કવિઓએ ગાયો કસુંબીનો રંગ
હો રાજ ગાયો કસુંબીનો રંગ
એવી મુક્તિને ક્યારે નિજ રક્તો રેડણહારે
પાયો કસુંબીનો રંગ
હો રાજ મને લાગ્યો કસુંબીનો રંગ

એ પીડિતની આંસુડા ધારે હાહાકારે
રેલ્યો કસુંબીનો રંગ
હો રાજ રેલ્યો કસુંબીનો રંગ
એવા શહીદોના ધગધગતા નિઃશ્વાસે નિઃશ્વાસે
સળગ્યો કસુંબીનો રંગ
હો રાજ મને લાગ્યો કસુંબીનો રંગ

એ ધરતીનાં ભૂખ્યાં કંગાલોને ગાલે
છલકાયો કસુંબીનો રંગ
હો રાજ છલકાયો કસુંબીનો રંગ
એવા બિસ્મિલ બેટાઓની માતાને ભાલે
કાંઈ મલક્યો કસુંબીનો રંગ
હો રાજ મને લાગ્યો કસુંબીનો રંગ

એ ઘોળી ઘોળી પ્યાલા ભરિયા રંગીલાં
હો પીજો કસુંબીનો રંગ
હો રાજ પીજો કસુંબીનો રંગ
એવા દોરંગા દેખીને ડરિયાં ટેકીલાં
હો લેજો કસુંબીનો રંગ
હો રાજ મને લાગ્યો કસુંબીનો રંગ