આઠેય કૂવા ને નવ પાવઠાં હો જી રે,
પાવઠે જોને પાણીડાં નિહાર્ય માણારાજ,
કલગીવાળો કાન,હે કાન તારું ઝુમખડું રે.
કાંઠે તે કાન ઘોડાં ખેલવે હો જી રે,
કાન મુને ઘડૂલો ચડાવ્ય માણારાજ,
કલગીવાળો કાન,હે કાન તારું ઝુમખડું રે.
આઠેય કૂવા ને…
તારો ઘડૂલો ગોરી તો ચડે હો જી રે,
થા તું મારા ઘર કેરી નાર માણારાજ,
કલગીવાળો કાન,હે કાન તારું ઝુમખડું રે.
આઠેય કૂવા ને…
કેડ રે મરડીને ઘડો ઉંચક્યો હો જી રે,
તૂટી મારા કમખાની કસ માણારાજ,
કલગીવાળો કાન,હે કાન તારું ઝુમખડું રે.
આઠેય કૂવા ને…
ભાઈ રે દરજીડા વીરા વિનવું હો જી રે,
ટાંક્ય મારા કમખાની કસ માણારાજ,
કલગીવાળો કાન,હે કાન તારું ઝુમખડું રે.
આઠેય કૂવા ને…
કસે તે ટાંક્ય ઘમર ઘૂઘરી હો જી રે,
હૈયે તે લખ ઝીણા ઝીણા મોર માણારાજ,
કલગીવાળો કાન,હે કાન તારું ઝુમખડું રે.
આઠેય કૂવા ને…
જાતાં વાગે રે ઘમ્મર ઘૂઘરી હો જી રે,
વળતાં ઝીંગોરે ઝીણા મોર માણારાજ,
કલગીવાળો કાન,હે કાન તારું ઝુમખડું રે.
આઠેય કૂવા ને…